பங்குனி உத்திரம்

பங்குனி உத்திரம்
                 பங்குனி மாதத்தில் உத்திர நட்சத்திரத் தோடு பௌர்ணமி கூடிவரும் நாளில் பங்குனி உத்திர விழா கொண்டாடப்படு கிறது. பூமி மீன ராசியில் சஞ்சரிக்கும் காலம் பங்குனி மாதம்.

பங்குனி உத்திர நாளை கல்யாணசுந்தரர் விரதமாகவும் திருமண விரதமாகவும் அனுஷ்டிப்பார்கள். இந்த நாளில் பார்வதி உடனான பரமேஸ்வரனை திருமணக் கோலத்தில் தியானித்து விரதம் இருப்பார் கள். இளைஞர்களும் கன்னிப் பெண்களும் இந்த விரதத்தை அனுஷ்டித்து வழிபட்டால், விரைவில் திருமணம் கைகூடும் என்பது நம்பிக்கை. இந்த விரதத்தின்போது பகல் முழுதும் உணவு உட்கொள்ளாமல் இருந்து இரவில் சர்க்கரை சோறும் பழமும் உட்கொள்வர்.

சிவன் கோவில்களில் சிவனையும் சக்தி யையும் விசேஷமான ஆடை, ஆபரணங்கள், மணமாலை அணிவித்து மணவறையில் அமர்த்தி, வேதபாராயணத்துடன் திருமண வைபவங்கள், திருமாங்கல்ய தாரணம் நிகழ்த்தி இறைவன் அருள் பெறுவர்.

பங்குனி உத்திர நன்னாளில் முருகன் திருமணம், மீனாட்சி- சுந்தரேஸ்வரர் திருமணம், ஆண்டாள்- ஸ்ரீரங்கநாதர் திருமணம், ரதிக்காக சிவபெருமான் மன்மதனை எழுப்பியது, அர்ஜுனனின் பிறப்பு, ஸ்ரீஐயப்பன் அவதாரம் ஆகிய புனித நிகழ்வுகள் நிகழ்ந்ததாகப் புராணங்கள் கூறுகின்றன.

இந்த நாளின் சிறப்பை,

"மலிவிழா வீதி மட நல்லார் மாமயிலைக் கலிவிழாக் கண்டான் கபாலீசுரம் அமர்ந்தான்'

என்ற திருஞானசம்பந்தரின் பாடல் மூலம் அறியலாம்.

மயிலாப்பூரில் வாழ்ந்து வந்த சிவநேசர் என்ற சிவபக்தரின் புதல்வி பூம்பாவை திருஞானசம்பந்தருக்குத் திருமணம் முடிக்க நிச்சயிக்கப்பட்டிருந்தாள். அவள் பூஜைக்கு மலர் கொய்யச் சென்றபோது அரவம் தீண்டி மரணமெய்தினாள். அவளது சாம்ப லையும் எலும்பையும் ஒரு பொற்குடத்தில் பாதுகாத்து வைத்திருந்தனர்.

கபாலீஸ்வரருக்கு பங்குனி உத்திரத்தன்று நடைபெறும் ஒன்பதாம் திருவிழாவின் போது சம்பந்தர் அங்கு வந்தார். அப்போது பொற்குடம் அங்கு கொண்டு வரப்பட்டு அவர் முன்பு வைக்கப்பட்டது. சம்பந்தர் மேற்கண்ட பதிகத்தை-

"பலி விழாப் பாடல் செய் பங்குனி உத்தரநாள்
ஒலி விழாக் காணாதே போதியே பூம்பாவாய்'

எனப் பாடி முடித்ததும், பூம்பாவை உயிர் பெற்றெழுந்தாள் என்பது வரலாறு.

இந்நாளில், சில கோவில்களில் மூர்த்திகள் கடல், ஏரி, ஆறு போன்ற நீர் நிலைகளுக்கு எழுந்தருளி தீர்த்தம் கொடுப்பர்.

மதுரை, திருவாரூர், காஞ்சிபுரம், பழனி, வேதாரண்யம் ஆகிய தலங்களில் இந்த விழா மிகவும் சிறப்பாகக் கொண்டாடப்படுகிறது. காஞ்சிபுரத்தில் இந்த விழா சிறப்பாகக் கொண்டாடப்படுவதற்கு ஒரு புராண வரலாறும் உண்டு.

ஒருசமயம் பார்வதி தேவி சிவபெருமானின் கண்களை விளையாட்டாகப் பொத்தி விட்டாள். அதனால் பிரபஞ்சமே இருண்டு விட்டது. இயக்கங்கள் ஸ்தம்பித்தன. இதன் காரணமாக தேவி சிவபெருமானின் சாபத்தைப் பெற்றாள். சபிக்கப்பட்டதோடு, சிவபெருமானின் மனைவி என்ற அந்தஸ்தையும் இழந் தாள். தன் உரிமையை மீண்டும் பெறுவதற் காக தேவி காஞ்சிபுரத் தில் ஒரு மாமரத்தடி யில் சிவபெருமானை நோக்கித் தவமிருந்தாள். அவளது தவத்தில் திருப்தியுற்ற இறைவன் அவளுக்குப் பழைய நிலையை அருளினார்.

மீனாட்சியை சுந்தரேஸ்வரர் திருமணம் செய்து கொண்ட வரலாறும் புராணத்தில் கூறப்பட்டுள்ளது. ஆடிப்பூரத்தில்- பூரட்டாதி உச்சத்தில் இருந்தபோது, மதுரை நகரில் நடத்தப்பட்ட யாகம் ஒன்றில் தோன்றிய மீனாட்சி, அந்த நாட்டை ஆண்டு வந்தாள். மீனாட்சி உலகை வலம் வரும் பயணத்தை மேற்கொண்டபோது, வடகிழக்குத் திசையில் சிவபெருமான் காட்சி அளித்து மீனாட்சியை வாழ்த்தி, அவள் தலைநகருக்குத் திரும்பியபின் அவளைத் திருமணம் செய்துகொள்வதாக வாக்களித்தார்.

மதுரை திரும்பிய மீனாட்சி இறைவன் தன்னைத் திருமணம் செய்து கொள்ளப் போகும் நாளை எதிர்பார்த்துக் காத்திருந்தாள். ஒரு திங்கட்கிழமையுடன் கூடிய பங்குனி உத்திரத் திருநாளில் இறைவன் சுந்தரேஸ் வரர் என்ற பெயரில் மீனாட்சியின் அரண் மனையில் தோன்றி, அவளைத் திருமணம் செய்து கொண்டார். இந்த நிகழ்வின் அடிப் படையில்தான் மதுரையில் பங்குனி உத்திர விழா சிறப்பாகக் கொண்டாடப்படுகிறது.

பங்குனி உத்திரத்தன்று தண்ணீர்ப் பந்தல் அமைத்து நீர்மோர், பானகம் போன்றவற்றை வேண்டுதல் செய்துகொண்டு வழங்குவார்கள்.

முழு மனதோடு- உண்மையான ஈடுபாட்டோடு பங்குனி உத்திரத்தன்று வழிபாடு செய்தால், அனைத்து மங்கலங்களும் உண்டாகும்