சங்கர நாராயணனாகக் காட்சி தந்த சிவன்!

 

சிவபெருமானும் திருமாலும் வேறு வேறல்லர். காரண- காரியங்களுக்காகத் தனித்தனி மூர்த்திகளாகத் திகழ்கின்றனர். இருவரும் ஓருருவில் காட்சியளிக்கும் சங்கர நாராயணரின் தோற்றம் அற்புதமான திருக்காட்சி!

காசிப முனிவரின் புதல்வர்களில் வாசுகி, ஆதிசேஷன் ஆகிய நாகங்கள் நாக அரசர் களாகத் திகழ்பவர்கள். சிவனாரை வழி பட்டுத் தவமியற்றிய வாசுகி, அவரது கழுத் தில் நாக ஆபரணமாக விளங்கும் பேறு பெற்றது. திருமாலை வேண்டித் தவமிருந்த ஆதிசேஷன், அவருக்குப் படுக்கையாக (ஆசனமாகவும்) விளங்கும் பாக்கியம் பெற்றது.

இவர்களது குலத்தில் வந்தவையே அஷ்டமா நாகங்கள்! இவர்களில் சங்கன், பதுமன் ஆகியவை சாஸ்திரங்களைக் கற்று ஆராய்ச்சிகளில் ஈடுபட்டன. அத்துடன் தம் முன்னோரான வாசுகியை நோக்கிக் கடும் தவம் செய்தது சங்கன். அதற்குக் காட்சியளித்த வாசுகி, "சிவமே பரம்பொருள்; அவருக்குப் பணிபுரிவதே பாக்கியம்' என்று உபதேசித்தது. அதுபோல் தன்னை வேண்டித் தவம் இருந்த பதுமனுக்கு, "விஷ்ணுவே பரம்பொருள்; அவரை வணங்குவதே பெரும் பேறு' என்று உபதேசித்தது ஆதிசேஷன்.

முன்னோர் உபதேசித்தபடி சங்கனும் பதுமனும் தங்களது வழிபாடுகளைத் தொடங்கிட, காலப்போக்கில் "சிவன்- விஷ்ணு இருவரில் யார் பெரியவர்?' என்ற சர்ச்சை இருவரிடமும் உண்டாக, நாக அரசர்களின் கருத்துப்படி பூலோகம் வந்து மகாமுனிவர்களிடம் விடை கேட்க விழைந்தனர்.

பூலோகத்தின் புனித நதிகளில் நீராடி, பல ஆலயங்களைத் தரிசித்து, அங்கு தவம்புரியும் ரிஷிகளை வணங்கி தங்கள் வினாவைக் கேட்க, அவர்களோ "சிவபெருமானே பெரியவர்; அவரே பரம்பொருள்' என்று விளக்கி, சாஸ்திர நூல்களையும் காட்டினர்! ஆனால் பதுமன் இதை ஏற்கவில்லை. அதனால் தேவலோகத்தில், தேவகுருவான வியாழ பகவானிடம் சென்று கேட்கும்படிக் கூறினர்.

தன்னைத் தேடிவந்த சங்கனுக்கும் பதுமனுக்கும் விளக்கம் அளித்தார் வியாழ பகவான். ""ஒருமுறை சிவபெருமானை நோக்கித் தவம் இருந்தார் மகா விஷ்ணு. அவரது தவத்தில் மகிழ்ந்த சிவன், பெருமாளுக் குக் காட்சியளித்து, எத்தகைய நபரையும் மயக்கும் சக்தியை அவருக்கு வழங்கினார். இதனால், "மாயன்' எனும் பெயர் பெற்றார் பெருமாள். அதுமட்டுமா? சிவன் தன் மேனியில் இடப்பாகத்தை திருமாலுக்கு அளித்து, "அரியும் சிவனும் ஒன்றே' என்று சொல்லும் விதமாகக் காட்சியளித்தார்.

பிறிதொரு தருணம் "ஞானம், செல்வம் இரண்டையும் தரும் வடிவமே சங்கரநாராயணர் வடிவம்' என்று உமா தேவிக்கு எடுத்துரைத்தார் சிவன். உடனே அம்பிகை, "அக்கோலத்தைத் தரிசிக்கும் பாக்கியம் எனக்கு வேண்டும்' என்று வேண்டினாள்.

"கடும் தவத்தின் மூலமே அந்த பாக்கியத்தைப் பெற முடியும்' என்றார் சிவன். அதன்படி, பொதிய மலைச் சாரலில் உள்ள புன்னை வனம் சென்று, அங்கு புற்று வடிவில் இருக்கும் சிவனாரைப் பூஜித்து கடும் தவம் புரிந்து வருகிறாள் உமாதேவி.

""தேவர்கள் மரங்களாக இருந்து பூஜைக்குத் தேவையான பூக்கள், பழங்கள், தேன் முதலியவற்றை வழங்கி வருகின்றனர். தேவலோக மாதர்கள் பசுக்கள் வடிவில் விளங்கி பால் அளிக்கின்றனர். அக்னி விளக்கொளியானது. வாயு அந்த இடத்தை சுத்தம் செய்தது. முனிவர்களும் கந்தர்வர்களும் வேதம் மற்றும் வாத்தியங்களை முழங்கும் திருப் பணியைச் செய்து வருகிறார்கள். தேவியைப் போலவே இன்னும் பலரும் சிவனாரின் அந்த அற்புதக் கோலத்தைக் காண தவம் செய்கின்றனர். நீங்களும் அங்கு சென்று தவம் புரியுங்கள்'' என்றார் தேவகுரு.

இதையடுத்து சங்கனும் பதுமனும் புன்னை வனம் வந்து தவம் புரிந்தனர். இவர்களது தவம் குறித்து திருமாலிடம் கேட்டார் ஆதிசேஷன். அதற்கு, ""பிரம்மா, விஷ்ணு, சிவன் ஆகிய மூவரும் ஒருவரே. எம்முடன் இணைந்த உருவத்தில் இவர்களுக்குக் காட்சி தந்து அருளுவார் சிவபெருமான்'' என்றார் மகாவிஷ்ணு.

அவரது வாக்கு பலித்தது! ஆடிமாதப் பௌர்ணமி நாளில், திருமாலுடன் இணைந்த சங்கரநாராயணர் திருக்கோலத்தைக் காட்டி அருளினார் சிவனார்.

இவரது வலப்புற சிரசில் கங்கை மற்றும் சந்திரன்; காதில் நாககுண்டலம்; நெற்றியில் திருநீறு; கையில் மழு; தோளில் கொன்றைமலர்; மார்பில் பொற்பூணூல்; இடுப்பில் புலித் தோல் ஆடை; காலில் சர்ப்பமயமான வீரக்கழல்.

இடப்புற சிரசில் ரத்தினமணி கிரீடம்; காதில் மகர குண்டலம்; நெற்றியில் நீலமணி பதித்த கஸ்தூரி திலகம்; கையில் சங்கு; தோளில் துளசி மாலை; இடுப்பில் பீதாம்பரம்; காலில் பொன்னாலான வீரக்கழல் என சங்கர நாராயணராகக் காட்சியளித்தார் சிவனார்.

உமாதேவி மெய்சிலிர்த்தாள். "சிவபெருமானும் திருமாலும் வேறு வேறல்லர். காரண- காரியங் களுக்காகத் தனித்தனி மூர்த்திகளாக விளங்கு கின்றனர்' என்பதை அறிந்த சங்கனும் பதுமனும் கண்ணீர் மல்கக் கரம்கூப்பி வணங்கி நின்றனர்.

அவர்களிடம், ""என்ன வரம் வேண்டும் கேளுங்கள்?'' என்றார் சிவபெருமான்.

""நாங்கள், இங்கு அமைத்துள்ள சுனையில் நீராடி தங்களைத் தரிசிப்பவர்களுக்கு வளமான வாழ்வும் மோட்சப் பேறும் தந்தருள வேண்டும்'' என்று சங்கனும் பதுமனும் பிரார்த்தித்தனர். ""அப்படியே ஆகட்டும்'' என்று அருளினார் சிவனார். பின்னர், புன்னை வனத்தில் இருந்த லிங்கத்தில் ஐக்கியமாகி மறைந்தார் உமா தேவியார். இந்த நிகழ்வை வாமன புராணம் விளக்குகிறது.

இப்படி... உமாதேவி உள்ளிட்டோருக்கு, ஸ்ரீசங்கர நாராயணராக சிவனார் காட்சி தந்த தலமே திருநெல்வேலி மாவட்டத்திலுள்ள சங்கரன் கோவில்